DataLife Engine - Softnews Media Group

„თუკი გსურთ, რომ ქალი მამაკაცით დააინტერესოთ, უთხარით, რომ ამ მამაკაცს საეჭვო წარული აქვს“ – წერდა თავის დროზე "დეტექტივების დედოფლად" წოდებული, უდიდესი მწერალი ქალი აგათა კრისტი. წერდა და მისი მოსაზრება აბსოლუტური ჭეშმარიტება გახლდათ. ქალების უმეტესობას, მოსწონს თავზეხელაღებული და არაპროგნოზირებადი მამაკაცები. მაგრამ ვერ ითვალისწინებენ მედლის მეორე მხარეს, ყველაფერი ხომ ოქრო არ არის, რაც სიბრჭყვიალით გამოირჩევა. შესაბამისად, ქარიზმატული მამრის გვერდით ყოფნა ბევრ მსხვერპლს, მოთმინებასა და დრამატულ ეჭვიანობის სცენებს ითვალისწინებს.

ასტროლოგებს მიაჩნიათ, რომ ყველაზე ხშირად გერეგნული მონაცემების მიუხედავად სუსტის სქესის გულს უპირობოდ იპყრობს სამი ზოდიაქოს ნიშანი – ტყუპი, მშვილდოსანი და მორიელი. ამათგან ორი ქალის მოხიბვლას საკუთარ ენასა და კომუნიკაციის უზადო უნარს უნდა უმადლოდეს. მოგეხსენებათ, "ქალებს, ყურებით უყვართ". მაგრამ რითი ხიბლავს პირქუში, სიტყვაძუნწი და უჟმური მორიელი მანდილოსნებს? რითი და უზომო სექსუალურობით. მან სიტყვაც რომ არ თქვას ზედმეტი, ქალები მორიელის მაგნეტიზმით ტყვევდებიან და როგორც გველისგან მონუსხული ბაჭია ისე ემორჩილებიან მორიელის კაპრიზებს.

მოკლედ, ჩემი რჩევა იქნება არასოდეს მოუსმინოთ ხანგრძლივად ტყუპს და მშვილდოსანს და არასოდეს ჩახედოთ მორიელს თვალებში. წინააღმდეგ შემთხვევაში ხანგრძლივი "თავის ტკივილი" გაქვთ გარანტირებული სამომავლოდ.

დრო დადგა "უკუჩვენებებზეც" ვისაუბროთ. სამივე მამაკაცს გააჩნია ე.წ. "ჩრდილოვანი თვისებები" ხასიათში. ტყუპს და მშვილდოსანს ერთგულებაზე ამაოდ ნუ "დატესტავთ". მერწმუნეთ, გულნატკენი დარჩებით. ის კი არა, თქვენი თანდასწრებით თუ სხვა ქალებს ეფლირტავება ეს ორი, კარგი იქნება თუ მოარიდებთ თვალს. სკანდალს თუ არ მოუწყობთ და განშორებით არ შეაშინებთ შანსი იმისა, რომ ფიზიკურად გიღალატოთ ძალზე მცირეა. თუ მაინც დაიჟინებთ, შესაძლოა უბრალოდ "ჯიბრით" წავიდეს სხვასთან რათა ერთ საღამოს მაინც დაისვენოს თქვენი პრეტენზიებისგან.

მორიელთან საქმე სხვაგვარადაა – დაიმახსოვრეთ, ის რისი უფლებაც აქვს მას, აბსოლუტურად გეკრძალებათ თქვენ. ამიტომ მოგიწევთ მისი სულისშემხუთველი ეჭვიანობის, მაშინ, როცა თავად სად დადის და რას აკეთებს ვერასოდეს გაიგებთ. ან თუ გაიგებთ, მერწმუნეთ, არ მოგეწონებათ. მორიელი მამაკაცის დადებითი თვისება არის ის, რომ ბევრ მათგანს (თუმცა არა ყველას!) საყვარელი ქალის ერთგულება რეალურად შეუძლია. თუმცა, სწორედ მორიელი იქნება ის "მანიაკი", რომელიც სხვა ქალთან ღია ფლირტით მოგიწამლავთ ნერვებს, თუკი ღმერთმა დაგიფაროთ და მას თქვენში დაეჭვების იოტისოდენი საბაბი მიეცით. არ დაგავიწყდეთ, ამ ადამიანს ნგრევაც და შენებაც ერთნაირი ოსტატობით ეხერხება. ჰოდა, ნუ მისცემთ საბაბს დაანგრიოს თქვენი ცხოვრება. მართალია, ნანგრევებში შეიძლება თავადაც მოყვეს, მაგრამ რაც არ უნდა გაუჭირდეს განშორება, თქვენ აღარასოდეს დაგიბრუნდებათ.

როგორც ასტროლოგებს მიაჩნიათ, გამდიდრებისა და დიდი ფულის შოვნის შანსს, ყოველთვის როდი განაპირობებს ის თუ რამდენად შრომისმოყვარე, ეკონომიური მხარჯველი ან კომერციული ნიჭის მქონეა ესა თუ ის ინდივიდი. ძალზე ხშირად ბევრს უბრალოდ უმართლებს, ხვდება საჭირო დროს, საჭირო ადგილას და აქვს ბედნიერება აკეთოს საქმე, რომელიც მას სიამოვნებას ანიჭებს. იმის კეთება კი რისი კეთაბაც გიყვართ, ადრე თუ გვიან ყოველთვის იძლევა მატერიალურ შემოსავლებს. სიმდიდრე, რომლის შესახებაც ადამიანების 98% ოცნებობს, ხშირად ვიღაცისთვის უბედურებისა და სირთულეების მიზეზიც შეიძლება გახდეს ცხოვრებაში. იმის მიხედვით, თუ რამდენად მაღალია ადამიანში სულიერების დონე, განისაზღვრება მისი დამოკიდებულება ფულთან მიმართებაში. ამიტომაც ხდება რომ ზოგს, დიდი ფული უბრალოდ "აფუჭებს" და დეგრადაციის გზაზე დადგომას აიძულებს, ისე რომ ხშირად თავადაც ვერ გაუცნობიერებია ეს. აქედან გამომდინარე სამყარო კანონზიმიერია და შესაბამისად, ყველას როდი აძლევს შანსს მატერიალური კუთხით მაღალ მაჩვენებელს მიაღწიოს, ზოგიერთისთვის სიმდიდრე და დეგრადაცია შესაძლოა სინონიმებად იქცეს ცხოვრებაში.

მსოფლიოს მასშტაბით ძალიან ბევრი ასტროლოგი აწარმოებს პირად პრაქტიკას და დაკვირვებას იმაზე, მაინც რა ნიშნით არიან შერჩეული ის ადამიანები კოსმოსის მიერ, ვისაც ეძლევა შანსი დიდი ფული გამოიმუშაოს. როგორც ასტროლოგიური სტატისტიკა ცხადყოფს, ყველაზე ქუდბედიანები – მშვილდოსნები მსოფლიოს მდიდარ ადამიანთა სიაში ერთობ მოკრძალებულ ბოლო ადგილებს იკავებენ. ამაში დამნაშავე ფულის უთავბოლოდ ფლანგვის სიყვარულია, რომელიც მშვილდოსნების 90% ახასიათებს.

საინტერესოა ის ფაქტიც, რომ სიმდიდრეს კარგად აგროვენებ ვერძები და ტყუპი. როგორც ცნობილია, ორივე ნიშანი ერთობ იმპულსური და არცთუ ეკონომიური დამოკიდბულებით გამოირჩევა ფულთან მიმართებაში. ასტროლოგებს მიაჩნიათ, რომ ამ ორის შემთხვევაში საუკეთესო ინვესტიცია მათივე ინტელექტი და ფანტაზიის უნარია. ვერძიც და ტყუპიც ნოვატორული ხედვის მქონე, აქტიური, დინამიური ნიშანია. შესაბამისად, ბევრი მათგანი სწორედ ამ თვისებების წყალობით მდიდრდება.

მხოლოდ და მხოლოდ საკუთარი შრომის, გონივრული ეკონომიისა და წინდახედულების ხარჯზე მდიდრდებიან ქალწულები და თხის რქები. თუმცა, კიდევ ერთ მიწის ნიშანს, კუროს იშვიათად უწევს რომ გახდეს დიდი ფულის მფლობელი. მიზეზი ნაკლები ამბიციებია. ქალწულებსა და თხის რქებს კი ფულის შოვნასთან ერთად, კარიერული ამბიციებიც აწუხებთ.

უამბიციოთა და შედარებით პასიურთა სიაში არიან თევზები და სასწორები. აქვე ისიც უნდა ითქვას, რომ ერთიც და მეორეც ე.წ. "გაორებული ნიშნის" წარმომადგენელია, რაც თავისთავად მიანიშნებს იმაზე, რომ ამ ადამიანებს დიდი ძალისხმევა სჭირდებათ საკუთარ თავში არსებული ქაოსისა და ყოყმანის დასაძლევად. ამის გამო ბევრი მათგანი უშვებს კარგ შანსებს უკეთესი ფინანსური მომავლის შესაქმნელად.

განსაკუთრებით ამბიციურთა კატეგორიაში ხვდებიან ლომები და მორიელები. ამ ხალხს როგორც წესი ცხოვრების მანძილზე გასაოცარი აღმასვლა-დაცემის პერიოდების გადატანა უწევს ფინანსური კუთხით. პრობლემა კი ის არის, რომ ერთიც და მეორეც მიდრეკილია სხვების ხარჯზე გამდიდრდეს, მოსწონს უფროსობა, ვერ იტანს დაქვემდებარებულის როლში ყოფნას და ფინანსური მადა, ხშირად უსწრებს მათ რეალურ შესაძლებლობებს. შესაბამისად, დიდ სიმდიდრეს, ხშირად მოსდევს მათ ცხოვრებაში აბსოლუტური სიღატაკის ან სამართლებრივი დავის პრეცენდენტი.

დაბოლოს, ფინანსებთან დამოკიდებულებაში პოლარულად განსხვავებული მიდგომა აქვთ მერწყულებსა და კირჩხიბებს. კირჩხიბების უმეტესობა რაც არ უნდა გაგიკვირდეთ მდიდარი, მოსალოდნელი სიღარიბის შიშით ხდება. ამ ხალხის უმეტესობას პანიკურად ეშინია იმის, რომ ერთ დღესაც გაიღვიძებს და მშიერი დარჩება ოჯახის წევრებთან ერთად. ამიტომაც ცდილობს გამოიმუშაოს მეტი და მეტი. პლუს ამას თითქმის ყოველთვის წუწუნებს ფულზე და არასოდეს მიაჩნია თავი მდიდარ ადამიანად.

რაც შეეხება მერწყულს, მას ფული და კაპიტალის დაგროვება არასოდეს აინტერესებს. ფულის მიმართ მარტოოდენ "მომხმარებლური" დამოკიდებულება გააჩნია. სჭირდება სხვადასხვა სახის კეთილი საქმის ან ახირებული იდეის განსახორციელებლად. თუმცა, როგორც დაკვირვებები ცხადყოფს, ვინ თუ არა მერწყული, ყველაზე ხშირად ხდება დიდი ფულის პატრონი, რომელსაც არასოდეს დაჰკანკალებს, ასტროლოგები თვლიან, რომ მერწყულის ქუდბედიანობას მისივე დამოკიდებულება განაპირობებს ფულის მიმართ – გაიხსენეთ მერწყულის სიმბოლო, რომელიც მთელ კაცობრიობას "არწყულებს", ასევეა ზოდიაქოს ნიშნით მერწყულიც, მისთვის არ არსებობს სოციალური დაყოფა. შესაბამისად, საკუთარ სიმდიდრეს იგი დიდსულოვნად უნაწილებს საზოგადოების ნებისმიერი ფენის წარმომადგენელს. ჰოდა, როცა გაცემა-მიღების ბალანსი დაცულია, რაღა თქმა უნდა სამყარო ასეთი ადამიანის გამდიდრებისთვის არაერთ შანსს გამოიმეტებს.

გიფქრიათ იმაზე, რომ ავტომობილებსაც კი რომელთა მიმართაც არაერთი, მამრობითი სქესის წარმომადგენელი ლამის იმავენაირ (თუ გაცილებით მეტს არა) სიყვარულსა და მიჯაჭვულობას განიცდის, როგორც საყვარელი ქალის მიმართ – საკუთარი ზოდიაქოს ნიშანი და დაბადების მონაცემები გააჩნიათ.
როგორც რუსი ასტროლოგი ვასილისა ვოლოდინა ამტკიცებს, მას საკმაოდ ხშირად მიმართავენ სასურველი და ასტროლოგიურად "თავსებადი" ავტომობილის შერჩევაში დახმარების თხოვნით. რაც არ უნდა სასაცილოდ მოგეჩვენოთ, არის ამაში ერთობ გონივრული მიდგომა და რაც მთავარია, ჭეშმარიტების მარცვალი.

ყველაზე სასურველი ვარიანტი იქნება, ავტომობილი, მისი გამოშვების წლის და აწყობის (ექსპლუატაციაში გაშვების) თარიღის მიხედვით რომ შეარჩიოთ. თუმცა, ხშირ შემთხვევაში ამის ფუფუნება ბევრ ჩვენთაგანს არ აქვს ან მისთვის მოსაწონი მოდელის შეგულებისას ნაკლებად ფიქრობს იმაზე თუ რამდენად შეეფერება ზემოხსენებული "რკინის ცხენი" მას და მის ასტროლოგიურ რუკას.

თუმცა, ისეთი შემთხვევებიც ბევრია ჩვენს რეალობაში, როდესაც ავტომობილს ერთი შეხედვით აბსოლუტურად მოულოდნელ სიტუაციაში უმტყუნებია პატრონისთვის. ბევრისგან გამიგია სხვა ვარიანტიც – "რაც ჩამოვიყვანე ამისმა რემონტმა და ნაწილებმა გამყიდაო." ჰოდა, ბატონებო (და ქალბატონებო), იქნებ ასტროლოგიურადაც გეცადათ სასურველი ავტომობილის შერჩევა?

დღეს, რა თქმა უნდა, ჩვენი სტატიის ფარგლებში თითოეული თქვენგანისთვის შესაფერისი ავტომობილის შესახებ ვერ მოგაწვდით ინფორმაციას, მაგრამ ზოგად სტატისტიკას სიამოვნებით გაგაცნობთ იმის შესახებ თუ კონკრეტულად რომელი მოდელის ავტომობილია თქვენი ზოდიაქოს ნიშნით დაბადებული პიროვნებისთვის შესაფერისი:


ვერძს ძლიერი ძრავის მქონე, "გამძლე" ავტომობილი სჭირდება. იდეალურია მოდელები: Audi TT ან Mazda Rx8

კურო ავტომობილის შეძენისას მის მაქსიმალურ კომფორტულობას და გამძლეობას ითვალისწინებს. შესაფერისი მოდელებია: Toyota, Saab, Volvo.

ტყუპისთვის ავტომობილი ისეთივე აუცილებელი და ორგანული რამაა როგორიც ხელი ან ფეხი. საუკეთესო არჩევანია შემდეგი მოდელები: Nissan X-trail, Volkswagen Tiguan, Land Rover Freelander

კირჩხიბი ისეთ ავტომობილს ეძებს, რომელიც მას და მის ოჯახს ხანგრძლივად ემსახურება. ფაქტობრივად ავტომობილი, მისი ოჯახის კიდევ ერთი წევრი უნდა იყოს. საუკეთესო ვარიანტია ამ მხრივ: Opel Zafira, Mazda 5, Honda FRV.

ლომისთვის ავტომობილს ერთგვარი, მდიდრული "აქსესუარის" დანიშნულება აქვს. მისით ლომმა პირველ რიგში თავი უნდა მოიწონოს საზოგადოებაში. ამიტომ ლომისთვის იდეალური იქნება Mercedes-Benz A-class ან Nissan Armada ტიპის მოდელები.

ქალწულისთვის ავტომობილის გამძლეობას, კომფორტულობასა და ხარისხს აქვს უდიდესი დატვირთვა. ამიტომ ქალწულმა არჩევანი შემდეგ მოდელებზე უნდა შეაჩეროს: Volkswagen, Land Rover Discovery 3.

სასწორისთვის ავტომობილის შერჩევა მისი ვიზუალური იმიჯის მოწონებით იწყება. საუკეთესო ვარიანტია ამ მხრივ: Alfa-Romeo, Fiat.

მორიელი საკუთარი ხასიათის შესაბამის, ექსტრემალური პირობების მიმართ კარგად ადაპტირებად მანქანას ეძებს. იდეალურია მისთვის: Mercedes-Benz E-class 55 AMG ან Land Rover Discovery

მშვილდოსანს ტევადი, გამძლე და ძალზე სწრაფი მანქანა სჭირდება. მისთვის იდეალურია: Citroen C4, Peugeot 30.

თხის რქას სოლიდურობა ხიბლავს. ის ცოტათი სნობია, ამიტომ მისთვის ისეთი მოდელებია შესაფერისი როგორიცაა: Saab, Volvo

მერწყულისთვის ინოვაციურობას, სუპერთანამედროვე დიზაინს აქვს დიდი მნიშვნელობა. საუკეთესო არჩევანია: Lexus RX400h, Nissan Primera

დაბოლოს, თევზებისთვის კომფორტთან ერთად, ავტომანქანის დაცულობას და კონსტრუქციის სიმძლავრეს აქვს მნიშვნელობა. სასურველია აირჩიოთ: BMW M235i ან Audi SQ5

ალბათ ნებისმიერ ჩვენგანს ჰქონია მრისხანების და ე.წ. "კვამლის გამოშვების" პერიოდი, როცა უკმაყოფილება ყველა შესაძლო ზღვარს აღწევს და ემოციები უკვე კონფლიქტის სახით ვლინდება. ასტროლოგებს მიაჩნიათ, რომ არსებობენ განსაკუთრებით კონფლიქტური, ნაკლებკონფლიქტური და თითქმის უკონფლიქტო ნიშნები. ყველაფერი დამოკიდებულია კონკრეტული ნიშნის მმართველ სტიქიაზე და ამ სტიქიის გამოვლინების სიძლიერეზე ამა თუ იმ ინდივიდში.

ყველაზე კონფლიქტური და აგრესიული ნიშნების კატეგორიაში გადიან ვერძები, მორიელები, მშვილდოსნები და ლომები. ამ ხალხის წონასწორობიდან გამოყვანა საკმაოდ მარტივი საქმეა. ისინი ხშირად გვევლინებიან ასევე კონფლიქტის უშუალო წამომწყებისა და ინიციატორის როლშიც. მათ შორის ყველაზე მძიმე შემთხვევა ვერძია, რომელიც ფაქტობრივად არაფრის გამო იწყებს ხშირად კონფლიქტს. არანაკლებ ფიცხია მშვილდოსანიც, ოღონდ ის უფრო "კოლექტიური" ბუნტისთავის როლში გვევლინება – უყვარს ჯგუფურად კონფლიქტის წამოწყება. რაც შეეხებათ ლომს და მორიელს, ორივე მათგანი დახვეწილი აგრესორია. ამიტომ ბრძოლას ყოველთვის წესების დაცვით და ღირსების შეგრძნებით აწარმოებენ. მათთვის სერიოზული კონფლიქტის შემთხვევაში ყველა გზა და მეთოდია მისაღები. ამ მხრივ, მორიელი განსაკუთრებული "ოსტატობით" გამოირჩევა.

შედარებით მეტი ლოიალურობით გამოირჩევიან კონფლიქტურ სიტუაციებში კირჩხიბი, თევზები, სასწორი და ქალწული. ამ ხალხს როგორც წესი იშვიათად ვხვდებით კონფლიქტის ინიციატორის ან აგრესორის როლში. მათ უმეტესობას ღია ბრძოლას ყოველთვის ურჩევნია კულისებიდან დააკვირდეს სიტუაციას და არასოდეს უბინდავთ რისხვა ისე გონებას, რომ სიტუაციის კონტროლი დაკარგონ.

საკმაოდ გვიან და იშვიათად ახასიათებთ გაბრაზება თხის რქებს და კუროებს. მათ უმრავლესობას იშვიათად სცალია ჩხუბისა და აყალმაყალისთვის. ისინი ძირითადად მშრომელი და მუყაითი ადამიანების კატეგორიას განეკუთვნებიან. თუმცა, თუკი ვინმე თავხედი გზას უშნოდ უღობავს, კუროსაც და თხის რქასაც გააჩნია საკმარისი რესურსი თავის და საკუთრების დასაცავად. ამიტომ ამ ორი ნიშნით დაბადებულის მოთმინებას ბოროტად ნუ გამოიყენებთ.

დაბოლოს, ასტროლოგების აზრით, ყველაზე არაკონფლიქტურთა სიაში ტყუპისა და მერწყულის ზოდიაქოს ნიშნით დაბადებული ადამიანები მოხვდნენ. მართალია, ტყუპის დიდ ნაწილს ენა სამართებელივით უჭრის და ხშირად ახასიათებს ცინიზმით გაჯერებული კომენტარები, მაგრამ რეალურ კონფლიქტებზე ტყუპები არასოდეს მიდიან. მათ ძალზე მოკლე მეხსიერება აქვთ საიმისოდ, რომ ვინმეზე წყენა გულით ატარონ. ხოლო რაც შეეხება მერწყულს მის ჰუმანურ და კოსმოპოლიტურ ფსიქოლოგიაში აგრესია და კონფლიქტი საერთოდ არ შედის. შესაბამისად, ნებისმიერი მერწყული არიდებს თავს ჩხუბს და დრამატულ ისტორიებს. არა იმიტომ რომ მშიშარა და ლაჩარია, არა – მას უბრალოდ არ მიაჩნია ჩხუბი კონფლიქტის დარეგულირების ეფექტურ მეთოდად.

როგორ ფიქრობთ, მყარი ნერვების პატრონი ხართ? ასტროლოგები თვლიან, რომ ადამიანების დიდი ნაწილი ხშირად გამოიყურება ერთი შეხედვით მშვიდად და აუღელვებლად. თუმცა, რეალური პრობლემების წინაშე აღმოჩენა ბევრ მათგანს აკარგვინებს საკუთარი თავისა და ემოციების ფლობის უნარს. ამ მხრივ განსაკუთრებით გამოირჩევა სამი ზოდიაქოს ნიშანი:

კირჩხიბი – ალბათ გიკვირთ მოტირალ-მოსლუკუნე კირჩხიბის სამეულში მოხვედრა. დასკვნების გაკეთებას ნუ იჩქარებთ სანამ სტატიას ბოლომდე არ ჩაიკითხავთ. მართლია, კირჩხიბი საკმაოდ სენსიტიური ნიშანია და ამაზე არც არავინ დავობს, მაგრამ მას და სხვას არავის ხელეწიფება პირველი ემოციური შოკის შემდგომ გასაოცარი "თვითგადარჩენის პროგრამა" აამუშაოს საკუთარ თავში და ნებისმიერი სირთულის სიტუაციიდან გამარჯვებული გამოვიდეს. კირჩხიბი, რომელსაც დრო საკმარისად აქვს საკუთარი უიღბლობს გამოსატირებლად საბოლოო ჯამში ყველა პრობლემის სრულ ლიკვიდაციას მოახერხებს ისე, რომ სხვებსაც იხსნის განსაცდელისგან.

მორიელი – მისი ნებისყოფა რკინისებურია და ამას ნებისმიერი ასტროლოგი დაადასტურებს. თუმცა, რაღა თქმა უნდა, უნებისყოფო და სოციოფობი მორიელებიც გვხვდებიან, მაგრამ დღეს ჩვენ გამონაკლისებზე არ ვსაუბრობთ. ჭეშმარიტი მორიელი ტანჯვასა და განსაცდელს არასოდეს უშინდება. მათი დევიზია "ყველა პრობლემას ორი უებარი წამალი აქვს – დრო და სიჩუმე". მორიელს ძალა შესწევს ხანგრძლივი პერიოდის მანძილზე მშვიდად, მდუმარედ და ჯიუტად აიტანოს ნებისმიერი გაჭირვება. ეს ყველაფერი მას კი არ გასტეხს სულიერად, პირიქით მასში პიროვნულ ზრდას გამოიწვევს და სულის სიძლიერეს აუმაღლებს.

თხის რქა – სიჯიუტე, პრინციპულობა და გასაოცარი ამტანობა ამ ხალხის სავიზიტო ბარათია. ბავშვობაში თხის რქები ხშირად ავადმყოფობენ და ვერავინ იტყვის თუ ამ მუდმივად და ავადმყოფურად მობუზული ბავშვისგან სამომავლოდ ასეთი ამტანი ინდივიდი გაიზრდება. თხის რქა კარგი კონიაკივითაა – რაც უფრო ემატება წლები, მით უფრო უკეთესი ხდება. როგორც სულიერად ისე ფიზიკურად უმჯობესდება და ძლიერდება. ამიტომ მას არამხოლოდ საკუთარი პრობლემების, სხვისი ტვირთის აღებაც კი ხელეწიფება თავის თავზე.

მართალია, ნებისმიერი ადამიანი ინდივიდია და მხოლოდ მისთვის დამახასიათებელი სახასიათო შტრიხებით გამოირჩევა; ამიტომ ის, თუ კონკრეტულად როგორ გაართმევს თავს ესა თუ ის ინდივიდი მეუღლის მოვალეობას დიდწილად არის დამოკიდებული მის პირად ასტროლოგიურ რუკაზე. თუმცა ასტროლოგები თვლიან, რომ არსებობს საკმაოდ ზუსტი სტატისტიკა, რომელი ზოდიაქოს ნიშნით დაბადებულ ქალებს შორის ვხვდებით იდეალურ ან იდეალურთან მიახლოებულ პოტენციურ მეუღლეებს.


კურო – ქალი კურო გასაოცარი სულის სიძლიერითა და ხასიათის სიმტკიცით გამოირჩევა. თქვენ შეიძლება გეგონოთ, რომ ამ მშვიდ, აუღელვებელ და ცოტათი ინერტულ მანდილოსანს არანაირად არ გააჩნია პრინციპული ხასიათი და ცხოვრებაში კონკრეტული პრიორიტეტები. მაგრამ მინდა გითხრათ, რომ ძალიან ცდებით. კურო მშვიდი არსებაა, თავს არასოდეს აბეზრებს არავის ხმამაღალი ლოზუნგებით, ამიტომ ცოლის როლშიც იმავე პოლიტიკას მიმართავს. ოჯახს ყოველთვის სერიოზული განსჯისა და აწონ-დაწონის შემდეგ ქმნის. სამაგიეროდ, ვისაც აირჩევს, მას ბოლომდე უერთგულებს. შეუძლია ნებისმიერი განსაცდელის დროს დაუდგეს ქმარს გვერდით როგორც თანასწორი და გაამხნევოს იგი სულიერად. ასეთი ქალი მამაკაცისთვის ჭეშმარიტი განძია, იმიტომ რომ მას გააჩნია მყარად ჩამოყალიბებული შეხედულებები და პრინციპები, რომელსაც მარტივად არასოდეს შეცვლის. შესაბამისად, ოჯახისა და ქმრის მიმართ მისი ერთგულება ჭეშმარიტად იმსახურებს აღფრთოვანებას.

კირჩხიბი – მისი უნიკალურობა იმაში მდგომარეობს, რომ საკუთარი თავის სრულად მიძღვნა შეუძლია ოჯახისთვის. ქალი კირჩხიბი გასაოცარი თავგანწირვით გამოირჩევა, თუკი საქმე ოჯახსა და ოჯახის ინტერესებს შეეხება. მას შეუძლია მეუღლეს ძალიან ბევრი შეცდომა აპატიოს, გაუგოს და კიდევ ერთი შანსი მისცეს მეასიათასჯერ. მართალია, ცოტა ბუტია და ფხუკიანია დროდადრო, მაგრამ ამის კომპენსირებას მოსიყვარულე ხასიათითა და გასაოცარი კულინარიული ოსტატობით ახერხებს. იგი უზომოდ მზრუნველია როგორც დედა. შესაბამისად, ბავშვებსა და ოჯახზე წინ არასოდეს დააყენებს კარიერას და პროფესიულ მიღწევებს.

სასწორი – მისი გარეგნული იმიჯი ხშირად აბსოლუტურად მცდარ "მესიჯს" აგზავნის საზოგადოებაში. ერთი შეხედვით სათუთი, პრანჭია და თავქარიანი მოჩანს, მაგრამ სწორედ ამ "ქალურ სისუსტეშია" მისი სიძლიერე. სასწორი ქალი დიპლომატიური, წინდახედული და ძალიან გამჭრიახია. მას შეუძლია გაჩუმდეს საჭირო მომენტში და დაუთმოს მამაკაცს, რათა ამ უკანასკნელს თავი სიტუაციის ბატონ-პატრონად აგრძნობინოს. თუმცა, არც ის შანსი გამოეპარება, როცა შესაძლებელია მეუღლეს საკუთარი მოსაზრებით მოქცევისკენ უბიძგოს. მაგრამ რაც არ უნდა გააკეთოს, იგი არასოდეს გააკეთებს ამას ზეწოლის ან ტვინის ბურღვის მეშვეობით. შესაბამისად, მამაკაცები აღმერთებენ სასწორ ცოლებს, მათი თანდაყოლილი სიბრძნისა და დიპლომატიურობის გამო. გარდა ამისა, ეს ის ქალია, რომელსაც გააჩნია გასაოცარი სიჯიუტე, როცა საქმე კონკრეტული მოსაზრების დაცვას ეხება. გარეგნული სირბილის მიუხედავად სასწორ ქალს შესწევს ძალა, ყოველთვის დარჩეს საკუთარ პოზიციაზე მით უმეტეს, თუკი გარშემო მყოფები გააფთრებით ცდილობენ მას მოსაზრება შეაცვლევინონ.

როგორ ფიქრობთ სიჯიუტე და პრინციპულობა ადამიანის ხასიათში ნაკლად მოიაზრება თუ ღირსებად? რაღა თქმა უნდა გააჩნია სიტუაციას და იმას, თუ კონკრეტულად რა მომენტში და სიტუაციაში გამოავლენს ინდივიდი ამ თვისებებს. თუმცა, დათმობა და ლოიალური მიდგომაც რომ ხშირად ვნებს საქმეს, ესეც უდავო ჭეშმარიტებაა. ასტროლოგები თვლიან, რომ ზოდიაქოს ნიშანი საკმაოდ კარგად ასახავს იმას რამდენად დამთმობი ან პირიქით ჯიუტი შეიძლება იყოს ესა თუ ის ზოდიაქოს ნიშნის წარმომადგენელი. ამ მხრივ ოქროს სამეულში შემდეგი ნიშნები შედიან:


ჯიუტი და პრინციპული


1. თხის რქა 98% - მისი სიჯიუტე ხშირად პროფესიული კუთხით უფრო ვლინდება. თუმცა არც პირდ ურთიერთობებში თმობს პოზიციებს მარტივად.

2. კურო 90% - მისი სიჯიუტე მასზე გამოვლენილი ზეწოლის პირდაპირ პროპორციულია, მოეშვით მასზე ზეწოლას და იგი დათმობაზე აუცილებლად წავა.

3. მორიელი 87% - გასაოცარი ნებისყოფის გამოვლენა შეუძლია, განსაკუთრებით მაშინ, როცა საქმე შურისძიებას ეხება. უზომოდ შეუბრალებელი და სასტიკია ამ დროს.



დამთმობი და ლოიალური

1. ტყუპი 98% - მისი ცვალებადი ხასიათი ითვალისწინებს იმას, რომ ტყუპს იშვიათად შეუძლია ერთ კონკრეტულ მიზანზე მკაცრად კონცენტრირება. შესაბამისად, მარტივად და უმტკივნეულოდ თმობს ხოლმე პოზიციებს.

2. სასწორი - 88% - სურვილი იმისა, გარშემო არავის აწყენინოს და ყველას თვალში კარგი იმიჯი შეინარჩუნოს, ხშირად უბიძგებს სასწორს დათმობისკენ. იგი ასევე ხშირად მიდის დათმობაზე კონფლიქტური სიტუაციის თავიდან აცილების მიზნით.

3. თევზები - 78% - რბილი, ხათრიანი და ნაკლებადბრძოლისუნარიანი ნიშანია. პრინციპულობის გამოჩენას და სიჯიუტეს ურჩევნია, უბრალოდ თავი აარიდოს ხოლმე მასზე დაკისრებულ ვალდებულებებს და "თევზივით" გასხლტეს.

ცნობილი ფრაზა - "გემოვნებაზე არ დავობენ" სამწუხაროდ, რეალობაში ნაკლებად ამართლებს. მეტიც, შეიძლება თამამად ითქვას, რომ ადამიანები ძირითადად სწორედაც რომ გემოვენებაზე დავობენ ყველაზე მეტს. ალბათ არავის მიაჩნია თავი უგემოვნოდ და სტილის არმქონე პიროვნებად. თუმცა, ასტროლოგებს მიაჩნიათ, რომ დახვეწილი გემოვნების ქონასაც ზოდიაქოს ნიშანი და მისი მმართველი პლანეტა განაპირობებს. ამიტომ გასაკვირი არაა, რატომ იმსახურებს ზოგიერთი საზოგადოების აღტაცებას საკუთარი ჩაცმის სტილითა და იმიჯით მაშინ, როცა სხვა საყოველთაო განსჯის საგანი ხდება ამ ზუსტად ამ კონტექსტში.

მიჩნეულია, რომ სილამაზის განსაკუთრებული აღქმით, ე.წ. "ვენერით მართული" ნიშნები გამოირჩევიან. კერძოდ ეს არის კურო და სასწორი. თუმცა, კუროს შემთხვევაში რაკიღა მიწის სტიქიასთან გვაქვს საქმე, მისი გემოვნება უფრო კომფორტის შექმნის მიდრეკილებაში ვლინდება (ინტერიერის დიზაინი, ფლორისტიკა, კულინარია) ვიდრე ჩაცმა-დახურვის საკითხში. თუმცა ვენერა მათთან რომანტიკულობას პირად ურთიერთობებში აძლიერებს, ამიტომ კურომ გასაოცარი ერთგულება და სენტიმენტალური სიყვარული იცის სწორედ ამ პლანეტის დამსახურებით.

რაც შეეხება სასწორს, იგი ვენერას ჭეშმარიტად "ჰაი-კლასის" წარმომადგენელია. ამიტომ ტიპურ სასწორს ვერასოდეს ნახავთ მოუწესრიგებელს, თმადაუვარცხნელს ან შეუსაბამო ფერის სამოსით. სასწორები დიდ ყურადღებას აცევენ აქსესუარებს, იცვამენ უზადო გემოვნებითა და ყოველთვის ზუსტად იციან, რომელი აქსესუარი რომელი ტიპის სამოსს შეუსაბამონ. გარდა ამისა, ვენერას გავლენა სასწორის ვიზუალზეც არანაკლებ აისახება. რის ხარჯზეც ამ ადამიანებს ულამაზესი ღიმილი და დახვეწილი მანერები გააჩნიათ. რაც კიდევ ერთ ქულას უწერს მათ გარშემო მყოფებთან ურთიერთობის საკითხში. თუკი თქვენ სადმე უხეში, ხისტი და გაუცინარი სასწორი შეგხვედრიათ, ე.ი. მას პირად რუკაზე მორიელის ან ვერძის ძლიერი გავლენა აქვს გამოხატული. თუმცა, სამართლიანობა მოითხოვს აქვე აღვნიშნოთ, რომ სწორედ ზემოხსენებული ორი ნიშნის გავლენა ანიჭებს ბევრ სასწორს ე.წ. "ბრუტალურ სექსუალურობას" ასე რომ ყველა მედალს ორი მხარე აქვს, ჩემო კარგებო.

რაკიღა საუბარი მორიელებსა და ვერძებზე ჩამოვარდა, მოდით, ამ ორი ნიშნის გემოვნებაზეც ვისაუბროთ მით უმეტეს, რომ ვერძს და მორიელს საერთო პლანეტა თანამმართველი გააჩნია - აგრესიული, ცეცხლოვანი მარსი. სწორედ მარსის გავლენით არიან ეს ადამიანები უზომოდ სექსუალურები და მიმზიდველები საპირისპირო სქესის თვალში. რაც შეეხება გემოვნებასა და სტილის შეგრძნებას, ვერ ვიტყვით, რომ ისინი იდეალურად ახერხებენ უზადოდ შეიმოსონ. თუმცა, ორივე მათგანს გააჩნია ჩაცმულობაში გარკვეული ქარიზმა. ამიტომ ხშირ შემთხვევაში მათთვის საყვარელი დახეული ჯინსები, უხეში ბათინკები და მკვეთრად მუქი მაკიაჟი, საკმაოდ თვალშისაცემად და საინტერესოდაც კი გამოიყურება. რაც მთავარია, ეს ყველაფერი სექსუალურობას ჰმატებს როგორც ვერძის, ისე მორიელის იმიჯს და ესეც საქმეა.

ნატიფი გემოვნებითა და სისადავით გამოირჩევიან ქალწულები, კირჩხიბები, თხის რქები და თევზები. ქალწულის ზოდიაქოს ნიშანს ზოგადად სძულს ყოველგვარი ზედმეტობა, ამიტომ მისი სტილი მინიმალისტურია ყოველთვის. სამაგიეროდ, ყველა ვისაც უზადოდ დაუთოებული შარვალ-კოსტიუმი აცვია, ჰალსტუხი წესების სრული დაცვით აქვს შეკრული და თმაც განსაკუთრებით აქვს დავარცხნილი ღერების სიზუსტით, აუცილებლად ქალწულია. ამ ადამიანებს ყოველთვის სისუფთავის "სუნი ასდით" და მუდმივად უზადოდ გამოიყურებიან. თხის რქა ტრადიციების მომხრეა. მოსწონს მკაცრი სტილი. რაც შეეხებათ თევზებსა და კირჩხიბებს, ორივე მათგანი სტიქიიდან გამომდინარე არაოფიციალურ, თუმცა საკმაოდ დახვეწილ იმიჯს ირჩევს ხოლმე. ამ ადამიანებს არ უყვართ ე.წ. "კორპორატიული დრეს-კოდი" და ცდილობენ სამსახურშიც მაქსიმალურად კომფორტულად იყონ შემოსილნი.

ნაკლებად აქცევენ ყურადღებას ჩაცმა-დახურვის საკითხს მშვილდოსნები და ტყუპი. თუმცა ამ ორს შორის განსხვავება ის გახლავთ, რომ ტყუპს როგორც წესი მით უმეტეს თუკი იგი ქალია, თანდაყოლილი შარმი შველის იმიჯის წარმოჩენის საკითხში. შესაბამისად, ქალი ტყუპისთვის მარტივია თუნდაც ჩითის კაბაშიც ქალურად და მაცდუნებლად გამოიყურებოდეს. მაშინ, როცა ქალი მშვილდოსნების გარკვეული კატეგორია საკმაოდ ინდეფერენტულად ეკიდება მოდას. ამ ადამიანებისთვის წინა პლანზე ჩაცმის კუთხით სამოსის კომფორტულობაა. ამის გამო, როგორც ქალ ისე მამაკაც მშვილდოსნებს ხშირად შეხვდებით კედებითა და სპორტულებით ერთობ მნიშვნელოვან მოლაპარაკებებზეც კი. რაც, რაღა თქმა უნდა, არ მოქმედებს კარგად მათ იმიჯზე.

დაბოლოს, გამოკვეთილი ინდივიდუალიზმით გამოირჩევიან სამოსის შერჩევისას, ლომები და მერწყულები. თუმცა როგორც ასტროლოგები თვლიან, ამ ადამიანებს ხშირად გარკვეული "ზედმეტობაც" ახასიათებთ ამ კუთხით. რაც იმაში ვლინდება, რომ ლომებს ოქროს და ზოგადად მკვეთრი აქსესუარების სიყვარული ხშირად ამსგავსებს სადღესასწაულო ნაძვის ხეს, ხოლო მერწყულის სურვილი მაქსიმალურად მოახდინოს თვითგამოხატვა სამოსითა და ვიზუალური იმიჯით, ზოგჯერ საზოგადოებაში მისი პერსონის ექსცენტრიკად შერაცხვის პრეცენდეტებს იწვევს - ეს გასაკვირი არ გახლავთ, მოლისფერი თმა, კლასიკურ პიჯაკზე მაქმანებიანი კაბა და ტატუ სხეულის ყველაზე უცნაურ ადგილას, ხშირად ხდება საზოგადოებაში მითქმა-მოთქმის საგანი.